Масты

Выбух пад выбары

Вылучэнца ва ўчастковую камісію, мастоўскага актывіста Руху “За Свабоду” Алега Пронскага, які два апошніх месяцы быў за мяжой,  выклікаюць ў КДБ. З хлопцам хочуць паразмаўляць пра мінскі выбух.

 

Студэнт Гродзенскага аграрнага ўніверсітэта Алег Пронскі у мінулую пятніцу вярнуўся з двухмесячнай сельска-гаспадарчай практыцы ў Польшчы. Яму патэлефанаваў супрацоўнік гродзенскага КДБ і запрасіў на размову, якая датычыць выбуху ў Мінску, што здарыўся ў ноч на 4 ліпеня.

 

Актывіст Руху “За Свабоду” Алесь Зарэмбюк лічыць, што пільная ўвага да юнака з боку спецслужбаў абумоўлена выключна ягоным удзелам у выбарчай кампаніі, бо Алег не быў у Беларусі з чэрвеня:

 

– Мы сабралі подпісы за вылучэнне Алега Пронскага у выбарчую камісію. Цяпер яго выклікаюць у КДБ. Мабыць яны хочуць пазнаёміцца з кожным дэмакратычным актывістам гарадзеншчыны асабіста. Гэтыя выклікі на размовы, якія, на жаль, набылі масавы характар, – сапраўдны псіхалагічны ціск на людзей. Мэта такіх дзеянняў – запалохаць нязгодных, зменшыць іх грамадскую актыўнасць, – мяркуе Алесь Зарэмбюк.

 

www.milinkevich.org