Масты

Баранавічы: акцыя ў гадавіну сьмерці дыктатара

 

Старшыня Саўнаркама СССР і РСФСР Уладзімер Ульянаў, які кіраваў бальшавікамі і савецкім урадам пад псэўданімам Ленін, сканаў у сваёй падмаскоўнай рэзідэнцыі "Горкі" 85 гадоў назад, 21 студзеня 1924 года.

У гадавіну сьмерці Леніна актывісты Баранавіцкага Маладога Фронту правялі адмысловую акцыю. Яны заклікалі народ задумацца аб пытаньнях: "А кім ён быў - Ленін? Хто ён, той чалавек, які аддаваў загады на масавыя забойствы людзей? Хто ён, чый рэжым нават пасля яго сьмерці забіваў мільёны?"

Усяго некалькі гадоў назад на цэнтральным пляцы, пляцы Леніна горада Баранавічы былі знойдзеныя рэшткі людзей. Ён рэпрэсаваў і забіваў, а зараз яго помнік стаіць на костках памерлых.

У сераду маладафронтаўцы паклалі да гэтага помніка вянок з калючага дроту, у цэнтры якога было напісана: "Забойцу беларускага народа" і раздавалі мінакам улёткі зь інфармацыяй пра жахі ленінізму.

Па словах саміх маладафронтаўцаў, яны гэта зрабілі з жаданьнем зацікавіць грамадзян роднай беларускай гісторыяй і выкрасьліць з розумаў хлусьлівыя ідэалы, навязаныя савецкім рэжымам.

www.mfront.net